ދިވެހިރާއްޖެ އުފެދިފައިވާ ގޮތުން ރާއްޖޭގެ 90 އިންސައްތައަކީ ކަނޑުގެ ސަރަހައްދެވެ. ބާކީ 10 އިންސައްތައަކީ ބިމުގެ ސަރަހައްދެވެ. އެހެންކަމުން ކަނޑުގެ ސަލާމަތާއި ރައްކާތެރިކަން ދެމެހެއްޓުމަށް ހާއްސަ އިސްކަމެއްދޭންޖެހިފައިވެއެވެ. މިގޮތުން ކޯސްޓްގާޑްގެ މަސްއޫލިއްޔަތުގެ ތެރޭގައި ކަނޑުމަތީގައި ހިނގާ ހާދިސާތުގައި ރައްޔިތުންގެ ފުރާނައާއި މުދާ ސަލާމަތްކުރުމާއި ދިވެހިރާއްޖޭގެ މިނިވަންކަމާއި ސިޔާދަތަށް، ނުރައްކަލެއް ނުވަތަ އުނިކަމެއް އަތުވެދާނެފަދަ ކަންތައްތައް ހުއްޓުވުމާއި ދިވެހިރާއްޖޭގެ ޤާނޫނާއި ޤަވާއިދުތަކާއި އެއްގޮތަށް ސިޔާސީ ސަރަހައްދާއި އިޤްތިސާދީ ސަރަހައްދު ހިމާޔަތްކޮށް ބެލެހެއްޓުމާއި ދިވެހިރާއްޖޭގެ ގޮނޑުދޮއްތަކާއި އެގޮނޑުތަކާއި ގުޅިފައިވާ ކަނޑުގެ ސަރަހައްދުތައް ތަގައްޔަރު ވެދާނެ ކަންތައްތައް ހުއްޓުވުން ހިމެނެއެވެ.

ކޯސްޓްގާޑްގެ ޚިދުމަތް ރާއްޖޭގެ އެކި ސަރަހައްދުތަކަށް އަވަސްކަމާއެކު ފޯރުކޮށްދިނުމަށް، އެމް.އެން.ޑީ.އެފް އޭރިއާ ކޮމާންޑުތަކުގައި ވަނީ ކޯސްގާޑްގެ ސްކޯޑްރަމްތައް އުފައްދާފައެވެ. މިގޮތުން އެސަރަހައްދެއްގައި ދިމާވާ ކަނޑުމަތީގެ އެކިއެކިކަންތައްތަކުގައި ހަރަކާތްތެރިވާނީ އެސަރަހައްދެއްގެ ސްކޯޑްރަމުންނެވެ.