މިމަހުގެ 19 އިން 23 އަށް ސްވިޓްޒަރލޭންޑްގެ ޖެނީވާގައި ބޭއްވުނު ގްލޯބަލް ޕްލެޓްފޯރމް ފޮރ ޑިޒާސްޓަރ ރިސްކް ރިޑަކްޝަންގެ 4 ވަނަ ސެޝަންގައި ބައިވެރިވެވަޑައިގަތުމަށްފަހު މިނިސްޓަރ އޮފް ޑިފެންސް އެންޑް ނޭޝަނަލް ސެކިއުރިޓީ ކާނަލް (ރިޓަޔަޑް) މުޙައްމަދު ނާޒިމް މިއަދު މާލެ ވަޑައިގަންނަވައިފިއެވެ.

ޔުނައިޓެޑް ނޭޝަންސް އޮފީސް ފޮރ ޑިޒާސްޓަރ ރިސްކް ރިޑަކްޝަންގެ ފަރާތުން އިންތިޒާމް ކޮށްގެން 2007 ވަނަ އަހަރުން ފެށިގެން ކޮންމެ ދެއަހަރަކުން އެއްއަހަރު ބާއްވާ ގްލޯބަލް ޕްލެޓްފޯރމް ފޮރ ޑިޒާސްޓަރ ރިސްކް ރިޑަކްޝަންއަކީ ކާރިސާތަކުން ލިބޭ ގެއްލުން ކުޑަކުރުމުގެ ދާއިރާއިން މައުލޫމާތާއި ތަޖުރިބާ ބަދަލުކޮށް، އެއްޤައުމު އަނެއް ޤައުމަށް މިދާއިރާއިން އެހީތެރިވެވޭނެ ގޮތްތައް ދެނެގަތުމަށްޓަކައި ދުނިޔޭގެ ހުރިހާ ޤައުމުތަކާއި ބައިނަލް އަޤްވާމީ ޖަމާއަތްތަކުން ބައިވެރިވާ ފޯރަމެކެވެ. އަދި މިއީ ދުނިޔޭގައި ބޭއްވޭ މިފަދަ އެންމެ ބޮޑު ބައްދަލުވުމެވެ.

މިބައްދަލުވުމުގައި ރާއްޖޭގެ ފަރާތުން މިނިސްޓަރ ވަނީ ރަސްމީ ބަޔާނެއް އިއްވަވާފައެވެ. މިބަޔާނުގައި މިނިސްޓަރ ވަނީ 2015 ވަނަ އަހަރުން ފެށިގެން އަމަލުކުރުމަށް އެކުލަވާލެވޭ ޑިޒާސްޓަރ ރިސްކް ރިޑަކްޝަން ފްރޭމްވަރކަކީ ދުނިޔޭގެ ހުރިހާ ޤައުމަކުން އަމަލުކުރުން ލާޒިމް ބައިންޑިންގ އެގްރީމެންޓަކަށް ހެދުމަށް ގޮވާލައްވާފައި ކަމަށާއި، މީގެ އިތުރުން ގްލޯބަލް ޕްލެޓްފޯރމްގެ އެޖެންޑާގައި ހިމެނުނު ތަރައްޤީވަމުން އަންނަ ކުދި ޖަޒީރާ ޤައުމުތަކުގެ ޙާއްސަ ބައްދަލުވުމުގައިވެސް މިނިސްޓަރ ވާހަކަފުޅު ދައްކަވާފައިވާ ކަމަށާއި މިގޮތުން، މިބައްދަލުވުމުގައި ދެއްކެވި ވާހަކަފުޅުގައި މޫސުމަށް އަންނަ ބަދަލުތަކުގެ ސަބަބުން ލިބޭ ގެއްލުންތަކާއި ކާރިސާތަކުން ލިބޭ ގެއްލުން ކުޑަކުރުމުގެ މަސައްކަތް އެކުއެކީގައި ކުރިއަށް ގެންދިއުމުގެ މުހިއްމުކަމުގެ މައްޗަށް އަލިއަޅުވާލައްވާފައެވެ. އަދި މިމަސައްކަތުގައި އެއްޤައުމު އަނެއް ޤައުމަށް އެހީތެރިކަން ފޯރުކޮށްދީ ތަޖުރިބާ ހިއްސާކުރުމުގެ މުހިއްމުކަމުގެ މައްޗަށް އެމަނިކުފާނު ވާހަކަފުޅު ދައްކަވާފައިވާ ކަމުގައި މިނިސްޓްރީ އޮފް ޑިފެންސް އެންޑް ނޭޝަނަލް ސެކިއުރިޓީން މަޢުލޫމާތު ދެއްވައެވެ. 

ގްލޯބަލް ޕްލެޓްފޯރމްގައި ހިމެނުނު ސެޝަންތަކުގައި ބައިވެރިވެވަޑައިގަތުމުގެ އިތުރުން ބައްދަލުވުމުގެ ހަވާސާގައި ސްވިޓްޒަރލޭންޑް، ނިއުޒިލޭންޑް، އިންޑޮނީޝިއާ، ސްރީ ލަންކާ، ޖަޕާން، ވަރލްޑް ބޭންކް، އޭޝިއަން ޑިޒާސްޓަރ ޕްރިޕެއަރޑްނަސް ސެންޓަރ އަދި ބިއުރޯ ފޮރ ކްރައިސިސް ޕްރިވެންޝަން އެންޑް ރިކަވަރީގެ ވަފްދުތަކުގެ އިސް ބޭފުޅުންނާއި ބައްދަލުކުރައްވާ ޑިޒާސްޓަރ މެނޭޖްމަންޓްގެ ދާއިރާއިން ދިވެހިރާއްޖެއަށް އެހީ ހޯއްދެވުމަށްވެސް މަޝްވަރާކުރައްވާފައިވާ ކަމުގައި މިނިސްޓްރީ އޮފް ޑިފެންސް އެންޑް ނޭޝަނަލް ސެކިއުރިޓީން މަޢުލޫމާތު ދެއްވައެވެ. 

ގްލޯބަލް ޕްލެޓްފޯރމް ފޮރ ޑިޒާސްޓަރ ރިސްކް ރިޑަކްޝަންގެ 4 ވަނަ ސެޝަންގައި ބައިވެރިވި ދިވެހިރާއްޖޭގެ ވަފްދުގައި މިނިސްޓަރ އޮފް ޑިފެންސް އެންޑް ނޭޝަނަލް ސެކިއުރިޓީ ކާނަލް (ރިޓަޔަޑް) މުޙައްމަދު ނާޒިމް ގެ އިތުރުން ހިމެނިވަޑައިގަތީ މިނިސްޓަރ އޮފް ޑިފެންސް އެންޑް ނޭޝަނަލް ސެކިއުރިޓީގެ ނައިބު އަލްފާޟިލާ ފާތިމަތު ތަސްނީމެވެ.

މި ލިޔުމާއި ގުޅޭ ވީޑިއޯ:

http://www.youtube.com/watch?v=5GmdhTEkcuA

http://www.youtube.com/watch?v=n2xbNquU5-Y&feature=youtu.be

ދ.މީދޫ ސިއްޙީ މަރުކަޒުގައި އެޑްމިޓްކޮށް ފަރުވާދެމުންއައި ދ.މީދޫ ރަށްމެދުގޭ އުމުރުން 82 އަހަރުގެ ޙައްވާ އިބްރާހީމް އެމްއެންޑީއެފް ސެންޓްރަލް އޭރިއާ ކޯސްޓްގާޑް ސްކޮޑްރަން އިން މިރޭ ފަތިހު މާލެ ގެނެސްދީފިއެވެ.

މިބަލިމީހާއަކީ، ފަޔަށް ލިބުނު އަނިޔާއެއްގައި ފައިބިންދައިގެންގޮސް، ފައިގެ މަސްގަނޑަށް އިތުރަށް ގެއްލުން ލިބެމުންދާތީ، މާލެގެނެސްދީފައިވާ ޙާލުބޮޑު ބަލިމީހެކެވެ. މިބަލިމީހާ މާލެގެނެސްދީފައިވަނީ މިބަލިމީހާއަށް ފަރުވާދިނުމަށް ބޭނުންވާ ޚާއްޞަ ޑޮކްޓަރަކު، މީދޫ ސިއްޚީ މަރުކަޒުގައި ނެތުމާ ގުޅިގެން، ދ.މީދޫ ކަައުންސިލުން އެމްއެންޑީއެފް ސެންޓްރަލް އޭރިއާގައި އެދިލެއްވުމާ ގުޅިގެންނެވެ.

މިރޭ ފަތިހު ގާތްގަނޑަކަށް 05:15 ހާއިރު މިބަލިމީހާވަނީ މާލެގެނެސް އައިޖީއެމްއެޗް ހޮސްޕިޓަލަށް ގެންގޮސްފައިވާކަމަށް އެމްއެންޑީއެފް ސެންޓްރަލް އޭރިއާއިން މަޢުލޫމާތު ދެއްވައެވެ.

މިއަދު އިރުއޮއްސުނުއިރު، އއ.ހިމަންދޫ ފަޅުކައިރިއަށް ޑައިވިނަށްގޮސް އުޅުނު ށ.ފުނަދޫ އުމުރުން 34 އަހަރުގެ އާދަމް ޙަސަން ޑީކޮމްޕްރެސް (ޑީކޯ) ވެ، ހާލުދެރަވުމާ ގުޅިގެން، އިތުރު ފަރުވާއަށް އެމްއެންޑީއެފް މާލެ އޭރިއާ ކޯސްޓްގާޑް ސްކޮޑްރަން އިން މާލެގެނެސްދީފިއެވެ.

މިހާދިސާގެ މަޢުލޫމާތު މިރޭ ގާތްގަނޑަކަށް 20:00 ހާއިރު، މެރިޓައިމް ރެސްކިޔު ކޯޑިނޭސަން ސެންޓަރ (އެމްއާރުސީސީ) އަށް ލިބުމާ ގުޅިގެން، މާލެ އޭރިއާ ކޯސްޓްގާޑް ސްކޮޑްރަން ހާބަރ ކްރާފްޓް ލޯންޗެއް މިބަލިމީހާ ގޮވައިގެން މާލެއައުމަށް ދަތުރުކުރަމުންދިޔަ ދޯނި ކައިރިއަށްގޮސް، މިމީހާވަނީ މިރޭ ގާތްގަނޑަކަށް 23:30 ހާއިރު މާލެގެނެސް އައިޖީއެމް ހޮސްޕިޓަލަށް ގެންދެވިފައެވެ.

އަދި މީގެ އިތުރުން، އައިޖީއެމްއެޗް ހޮސްޕިޓަލުން މިބަލީހާ ބެއްލެވި ޑޮކްޓަރުން މިކަމަށް ބޭނުންވާ ޚާއްޞަ ފަރުވާ ދިނުމަށް ޑިކޮމްޕްރެޝަން ޗެމްބަރއަށްލުމަށް ލަފާދެއްވުމާ ގުޅިގެން، މިރޭ ގާތްގަނޑަަކަށް 04:20 ހާއިރު މިބަލިމީހާވަނީ އެމްއެންޑީއެފް މާލެ އޭރިއާ ކޯސްޓްގާޑް ސްކޮޑްރަން އިން ބަނޑޮސް އައިލެންޑް ރިސޯޓަށް މިފަރުވާ ދިނުމަށް ގެންގޮސްދީފައިކަމަށް އެމްއެންޑީއެފް މާލެ އޭރިއާއިން މަޢުލޫމާތު ދެއްވައެވެ.

10:25 ކަނޑުމަތިން ފެނިގެން މުޙައްމަދު ފަލާޙު ނަގާފައިވާ ބޯޓަށް ކިޔާ ނަމަކީ "ހައްމޯނިއާ ޓިއުޓޮނިކާ".

08:50- މުޙައްމަދު ފަލާޙު ކަނޑުމަތިން ފެނިގެން ނަގާފައިވަނީ ޖަރުމަނުގައި ރަޖިސްޓްރީ ކޮށްފައިވާ ބޯޓަކަށް. މި ބޯޓަށް އޭނާ ފެނިފައިވާކަމަށް ލަފާކުރެވެނީ ރާއްޖެއާ ގާތްގަނޑަކަށް 900 މޭލް ބޭރުން. މިބޯޓް މެލޭޝިޔާއަށް ފޯރާނެ ކަމަށް ލަފާކުރެވެނީ މިމަހުގެ 25 ވަނަ ދުވަހުގެ ވަގުތެއްގައި.

08:45 - މަޢުލޫމާތު ލިބިފައިވާ ގޮތުގައި މި ބޯޓް ދަތުރުކުރަމުންދަނީ މެލޭޝިޔާ އަށް.

 08:30 - ފަރެސްމާތޮޑާއިން ޑިންގީއެއްގައި ނުކުމެ އުޅުނު މީހާ ފެނިއްޖެއެވެ.

ގދ.ފަރެސްމާތޮޑާ، ރޯޒީ ސައިޑް އުމުރުން 30 އަހަރުގެ މުޙައްމަދު ފަލާހް ފެނިގެން އޭނާ ކަނޑުމަތިން ނަގާފައިވަނީ ބޯޓަކަށް ކަމަށާއި، އެމްއެންޑީއެފް ކޯސްޓްގާޑަށް އާއިލާގެ ފަރާތުން މި މަޢުލޫމާތު ލިބުމުން، އެ ބޯޓަށް ގުޅައި އަދި މުޙައްމަދު ފަލާޙާއި ވަނީ ވާހަކަ ދައްކާފައެވެ. އެގޮތުން އޭނާގެ ޙާލު ރަނގަޅު ކަމަށް ކޯސްޓްގާޑުން މަޢުލޫމާތު ދެއްވައެވެ. (ތަފްޞީލް އަންނަނީ..)

އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) ގައި ހޭނައްތާ ޑޮކްޓަރެއްގެ ޚިދުމަތް މިއަދުން ފެށިގެން ދޭން ފަށައިފިއެވެ.

މިނިސްޓަރ އޮފް ޑިފެންސް އެންޑް ނޭޝަނަލް ސެކިއުރިޓީ ކާނަލް (ރިޓަޔަޑް) މުޙައްމަދު ނާޒިމް އޭޕްރީލް މަހުގެ 14 އިން 19 އަށް އިންޑިއާއަށް ކުރެއްވި ރަސްމީ ދަތުފުޅުގައި ހޭނައްތާ ޑޮކްޓަރެއްގެ ދަތިކަން އައިޖީއެމްއެޗަށް ކުރިމަތިވެފައިވާތީ އިންޑިޔާ ސަރުކާރުގެ ކަމާއިބެހޭ ފަރާތްތަކާ ބައްދަލުކުރައްވާ މަޝްވަރާ ކުރައްވާފައިވެއެވެ.

މިމަޝްވަރާތަކުގެ ދަށުން އިންޑިއާ ސަރުކާރުންވަނީ އެމްއެންޑީއެފްގެ ހޮސްޕިޓަލް "ސެނަހިޔާ" އަށް ހޭނައްތާ ޑޮކްޓަރެއް ފޮނުވާފައެވެ. މިޑޮކްޓަރު މަސައްކަތް ކުރުމަށް ހަމަޖެހިފައިވަނީ އައިޖީއެމް ހޮސްޕިޓަލުގައެވެ. މިގޮތުން މިއަދުން ފެށިގެން އައިޖީއެމް ހޮސްޕިޓަލުގައި މަސައްކަތްކުރައްވާ އިންޑިއާގެ ހޭނައްތާ ޑޮކްޓަރަކީ ލެފްޓިނަންޓް ކާނަލް ޑރ. ސަޕްރާ އަދިތުޔާއެވެ.